tea intoxication

雜誌訪問(中)

係今次整個準備過程中，我發現咗3樣野。

(1) 自己對茶嘅認識原來係咁膚淺, 雖然自稱鍾情於飲鐵觀音，亦勉勉強強講得出6大茶類，但就對當中製作工序，發酵程度和口味上嘅分別毫無認識;

(2) 我個人有個好衰嘅習慣，就係好多野唔迫埋身都唔會認真去做，好多時就係要有d壓力先認認真真咁開始，今次又係一個好例子，好慶幸有一個咁難得嘅機會。

(3) 同以前讀書時做project，工作時做tender，到依家做interview都一樣。當我鍾意做一件事嘅時候, 真係可以廢寢忘食，絕對唔係無時間食果種。我其實係一個唔餓得，一肚餓就會好忟同容易發脾氣嘅煩人。一般情況下我會選擇食飽先做，就算係返工遲到都要食個早餐先。所以能夠讓我廢寢忘食嘅事情，一定係我好有興趣同好專心做嘅事，令到我心甘情願唔食或食少少就滿足。我明白自己文筆同表達能力都好弱，不過我都想將我留意到睇到嘅野記底，好似我一開始講這裡是一個給自己思考的空間。

Be who you are and say what you feel because those who mind don’t matter and those who matter don’t mind
- Dr. Seuss

雜誌訪問 (上)

最近得到一個茶行朋友的邀請去接受一本飲食雜誌嘅訪問，內容係講茶和茶罐，而我嘅身份係一名茶愛好者同茶罐收藏者。老實講，我勉強可以叫做一位茶愛好者，正確d講應該係一位對茶行業有興趣者，但絕對稱不上是一位茶罐收藏者，因為我家裡連一個茶罐都無，如果唔係依個訪問真係唔知原來茶罐都分咁多種不同功能。

不過由於係幫朋友做”媒”，宣傳佢新開嘅concept tea cafe，所以知道係講茶罐時都幾緊張，做好多準備同資料收集。過兩日依位朋友仲計劃同我做個 training，免得我訪問時露餡，暴露了我對茶淺薄的認識。

奇怪的我竟然感到莫名其妙的興奮和期待，感覺就好似第一次去見客的心情，會想好多，準備好多，是一種久違了的感覺。另一方面，今次訪問亦可能是一個契機，促使我認真自動去認識茶文化，有助我日後加入這個行業。我常與太座說認識這位朋友係一個 shortcuts 協助我去做到自己想做的事。講就講咗好耐，今次終於要開始啦!

Small things done are better than big things talked about…

敢言

上星期六收工之後，我買咗盒blue berry 去沙田探一個朋友，其實講咗話要去探佢好耐，點知一拖就年幾，真係慚愧!

依個朋友其實係我舊老細，亦係我啓蒙老師，算係亦師亦友。由我2006年5月入公司到2009年11月，佢都俾咗好多機會我去嘗試同學習。我仲好記得入職 interview 嘅時候佢罵我將咭片收埋，直到依家我都有收到咭片放係枱面嘅習慣。而我最欣賞嘅係無論大小事情佢都會俾 guidelines ，而又俾信心我地自己去做，當時好enjoy返工，覺得學到好多野。

講真，自從佢走咗之後，公司變化好大，我講嘅唔單止係業務上，更多嘅係公司整個團隊嘅氣氛和 management level 處理事情嘅手法。曾經有一個同事係佢 annual review 嘅時候好感慨咁同我講， “erik，我地公司有好多好嘅習慣同做法都無延續下來，反而一些唔好嘅就多咗”，我無猜測同事嘅用意，因為我覺得佢係真心講出嚟，想公司好。坦白講，我雖然係一個小小嘅 manager，但當聽到這番說話嘅時候，真係好似俾人刺咗一刀咁，一針見血。

果陣時我不停係度諗，其他同事係點諗? 其他 manager 係感覺唔到，定係扮唔知呢? 一間三年都無開過會同同事溝通嘅公司; 一間無 vision 同 mission 嘅公司; 一個無學習對象和無方向嘅工作環境，其實仲值唔值得留低呢?

您在新的地方過得好嗎? 相信你嘅生活仍然係咁多采多姿，您可以再次給我指引嗎? 想念與您一起工作的日子。

醉翁之意不在酒(下)

最近一直因為囡囡嘅事都無時間同心情去寫下集。不過經過琴日之後，總算有個方向去跟進。hope for the best and prepare for the worst…

好啦! 上集提到同兩個朋友出嚟傾計飲酒，大家傾咗好多野，好enjoy。我對當晚傾談內容最感興趣就係大家公司嘅事。

我其中一位朋友係精算師，聽個名就知係大公司高薪厚職果種，聽佢講都應該係management level，佢話公司請嘅都係會考8A或以上果班高材拔尖生。我覺得係先天條件咁優秀嘅情況下，佢班同事都應該係自動波唔駛擔心佢唔識做，只係基本來個job orientation 同介紹一下公司文化同流程就可以，去管依班人應該唔會太困難，起碼幼稚的我是這樣想的。

不過我聽到佢嘆氣再睇一睇佢嘅表情，我就知道事實並不如我想這樣。佢話作為一個manager，當你發現同你一齊工作或幫你嘅同事都可能比你叻嘅時候，其實都有壓力。當然有時亦會出現貨不對辦嘅情況，讀書成績好又唔代表工作表現會好。

好多時大公司總係要請最好嘅最叻嘅人，這個是可以理解的，但作為中小型公司，我會偏向請”合適”嘅人材，佢唔一定要讀書成績好抑或好有經驗，反而係佢嘅態度，認同公司嘅文化，因為人望高處，中小型公司好難留得住叻人，反而係佢做到咁上下，先話要走對公司嘅影響仲大，加上成日憂心點樣留住佢又係麻煩，可苦呢!

醉翁之意不在酒(上)

琴晚同兩個好朋友(中學同學)出嚟睇波飲野傾計，大家由足球講到家庭，再由家庭講到工作，當中有好多好笑嘅野，亦有心煩嘅事，整個過程係分享，聆聽到各抒己見，亦高興沒有太多吹水嘅成份，好 enjoy。

我記得以前係好少參與這類型活動，個人而言係好怕出嚟不停飲酒吹水講廢話，到最後仲要攪到三更半夜無車返屋企。不過可能年紀漸大，依家真係有種醉翁之意不在酒嘅感覺，三五知己出來，傾嘅野係有point，點到即止。不過我仍然相信人數都係一個main point，3至5個人係最適合，如果人太多好多時一人一句就唔知講咗去邊。

講番我依兩位好朋友，佢地都屬於事業有成，高薪厚職，係我細小嘅朋友圈子裏算好好。我慶幸同佢地有keep住聯絡，原因係我覺得兩位都係攞個心出嚟做朋友，亦有好多野值得我去學習。要好好珍惜!

開始為自己建立一個思考的空間!!!

最近一兩年都有睇報紙(am730)專欄嘅習慣，而當中有兩個專欄係一定會追，一個係中原地產施老闆，另一個就係筆名CK嘅中小企老闆。其實兩個人文筆，風格和內容都好唔同，而唯一相同的是兩者嘅文章都會引導我去思考。

施老闆的文章好多時都會談及社會民生，政府施政(特別係房屋政策)，中國的政治體制，甚至世界大事。佢論點好清晰明確，前後呼應，比較中立唔偏激。基本上，我每次都以學習心態去閱讀施老闆嘅專欄，慢慢咀嚼和思考佢嘅論點。

CK的文章相對來講就比較草根，佢好少談論社會政治(佢經常指自己係一個商人是政治冷感的動物)，內容主要都係圍繞佢對身邊人與事的睇法。我對CK嘅文章比較有共鳴，雖然我唔係老闆，不過好多時佢談論公司內部管理人事問題和佢三歲小朋友嘅學業問題，我都會思考如果相同情況發生係我身上，我會點諗點處理，又會唔會同CK一樣。

我覺得一個人是必須不停思考，才會保留對人與事的批判性和懂得作出適當的選擇。如果唔係就好容易被人洗腦，不懂得是非黑白。

我一直都好想將自己生活所見所聞，高興的，心煩的，順境逆境都記錄下來，但奈何文筆表達唔好，所以直到現在都未有付諸實行。不過多咗睇專欄之後，我反而覺得要真正寫出嚟先可以明白到自己真正睇法，因為寫作過程往往係”強迫”你去思考，分析和組織，由想到寫，然後再想再寫，所得出嘅結論係經過反覆思考同，當然從多角度分析都係好重要。

我唔知自己可以堅持幾耐，不過會盡力去試寫多一些自己嘅感受。persistent…

驚喜的北京之旅

一個從來冇計劃過嘅三日兩夜北京business trip，估唔到有小小驚喜，因為所見到的客戶數量和效果反而比我以前嘅trip都好。出奇嘅係大部仲要係新客，即係見都未見過亦冇直接生意來往個種，但係佢地都樂意見我，起碼我約佢地嘅時候冇say no先。我係度諗究竟係我搵到個好好嘅藉口去約佢抑或係我嘅技巧進步咗?

再諗一諗，我覺得可能同我自己心態唔同有關。一開始提到原本冇計劃過依個trip，亦可以話今次係一個冇計謀冇目的嘅trip，只係覺得既然去得北京開半日會，不如留多兩日順便見幾個客，唔好浪費咗張咁貴嘅機票。

就係因為依個心態，係見面嘅時候我冇好似以前咁，好aggressive咁sale我地公司有幾多大客，係邊度有分公司，平常業務有幾好嘅廢話，務求要攞到生意，最起碼都要有個enquiry返去交差。反而我用多咗時間同客戶交流，了解佢地依家嘅做法同面對嘅困難，另外用緊邊個代理，原因又係咩。係整個會面過程都係有講有笑，比較輕鬆，而且唔會得有我講冇人講嘅情況。講真我好enjoy同客戶交流個過程，我對佢地有多咗了解，亦建立咗一種關係。果種關係唔係話好深厚，而係我覺得如果我再搵佢，佢一定唔會抗拒。

可能有高人會認為依種冇實質成效嘅見客係浪費金錢時間，亦可能有人覺得見客原本就應該係咁。之前我會好幼稚咁諗既然我係代表公司去見客，當然要有交代啦! 但經過今次依個經驗，我開始領悟到見客同識朋友一樣，唔可以太有目的，因為只有你用心去交流同聆聽，先可以建立到一段真正嘅relationship，起碼我係咁諗。

雖然最後旅程因為家事所以提早回港，不過我仍然覺得今次北京之旅係有意義，並沒有浪費。